O‘zbekiston futbol assosiasiyasi tomonidan har bir viloyatdagi futbol murabbiylarining kasbiy mahorati sinovdan o‘tkazilayotgani haqida xabar bergan edik.    Murabbiylar bilimlarini qaytadan sinovdan o‘tkazish navbati Navoiy viloyatiga yetib keldi. Navoiydagi "Yoshlik" sport majmuasida  murabbiylarni bilimlarini qayta  sinovdan o‘tkizish bo‘yicha amaliy seminar o‘tkazildi. Sinov imtihonlari O‘zbekiston futbol Assosiasiyasi vakillari rahbarligidagi viloyat komissiyasi a’zolari ishtirokida o‘tkazilmoqda.    Imtihon davomida murabbiylarning mashg‘ulotlar olib borishga qanday tayyorgarlik ko‘rganliklari, konspekt yozish, maydonni mashg‘ulotga tayyorlash, mashg‘ulot davomida bolalarga ko‘rsatmalar berib borish usullari, murabbiyning mashg‘ulot davomida o‘zini tutishi, futbolchilarning mashg‘ulotdagi xatolarini aniqlash, ko‘rsatib borish va o‘sha xatolarni to‘g‘irlash borasida amalga oshiradigan xatti-harakatlari tekshirildi. Shuningdek, murabbiylarning mashg‘ulot paytida bolalarni nazorat qilib borish uchun pozisiya tanlashdagi bilim va ko‘nikmalari hamda mashg‘ulot davomidagi faolligi ko‘zdan kechirildi.   Berilgan imkoniyatdan foydalana olmay, imtihonda salbiy natija ko‘rsatgan murabbiylar lisenziyasidan mahrum qilinadi.