Professional futbol ligasi ishchi guruhi va yangi tashkil etilgan Klublarni lisenziyalash bo‘limi 2019 yilgi mavsum rejalarini tuzib chiqishda davom etmoqda. Ayni vaqtda 2019 yilgi mavsum uchun Superliga va Pro-liga klublariga qanday talablar qo‘yilishi deyarli aniq bo‘lgan. Mazkur masala O‘FA Ijroqo‘mi tomonidan tasdiqlanganidan so‘ng futbol jamoatchiligi uchun e’lon qilinadi.
Unga qadar esa PFL rasmiy sayti 2019 yil uchun amalda bo‘ladigan ayrim bandlarni e’lon qilib boradi. Ulardan biri kelasi mavsumdan boshlab Superliga klubida bosh murabbiy sifatida faoliyat olib boradigan mutaxassisdan “Pro” lisenziyasining talab qilinishidir.
O‘FA qoshidagi murabbiylar malakasini oshirish vazifasi bilan shug‘ullanuvchi bo‘lim “Pro” lisenziyasi uchun navbatdagi kursni shu yilning noyabr oyida boshlashni rejalashtirgan. Ayni vaqtda mazkur bo‘lim mutaxassislari aniq sana borasida OFK tasdig‘ini kutmoqda.
Klublarni lisenziyalash bo‘limi “Pro” lisenziyasi kursida tahsil olayotgan murabbiylarga 2019 yilgi mavsum uchun shartli ravishda Superliga klubini boshqarishga ruxsat beradi. 2020 yildan boshlab yuqorida qayd etilgan tizimga to‘liq o‘tiladi. Demak, 2019 va 2020 yillar davomida O‘zbekiston Superligasida faoliyat olib borish niyatida bo‘lgan murabbiylar harakatni hozirdanoq boshlashi kerak bo‘ladi.
Bunga qadar esa PFL mahalliy mutaxassislar uchun talabni “A”, xorijiy mutaxassislar uchun esa “Pro” qilib belgilagandi. Qolgan jamoalar murabbiylari uchun talablar qanday bo‘lishi keyinroq rasman ma’lum qilinadi.
Ma’lumot uchun, ayni vaqtda Superliga klublarini boshqarayotgan quyidagi murabbiylarda “Pro” lisenziyasi yo‘q: Ro‘ziqul Berdiyev (“Nasaf”), Ulug‘bek Baqoyev (“Buxoro”), Hamid Aktamov (“Qizilqum”), No‘’mon Hasanov (“Qo‘qon-1912”), Bahrom Haydarov (“Neftchi”). Shuningdek, Superligaga yo‘l olish uchun nazariy imkoniyati bo‘lgan klublardan “Andijon”, “Surxon”, “Istiqlol”, “Dinamo” kabi klublar bosh murabbiylarida ham “Pro” lisenziyasi mavjud emas.
