Misr termasining Afrika kubogi saralashidan o‘rin olgan Tunisga qarshi uchrashuvi payti kameralar muxlis qizaloqning Muhammad Salohga murojaatini tasmaga muhrladi.

U o‘zi tayyorlagan plakatga "Salah please score. I want to go home, I have homework" (“Saloh, iltimos, gol uring. Uyga borib, dars qilishim kerak) deb yozgandi.

“Liverpul” futbolchisi faqatgina 90-daqiqada gol urdi. O‘yindan so‘ng darhol “Tvitter”ga kirib, muxlisasidan uzr so‘ragan. “Uyga ertaroq ketishing uchun astoydil harakat qildim, seni so‘nggi daqiqagacha kuttirib qo‘yganim uchun uzr so‘rayman. Umid qilamanki, ertaga o‘qituvching vaziyatni to‘g‘ri tushunadi”, - deb yozgan hujumchi.

Salohning golidan so‘ng misrliklar 3:2 hisobida g‘alaba qozonishdi. Umuman, mazkur uchrashuvning ahamiyati yuqori emasdi – Misr va Tunis termalari oktyabr oyidayoq Afrika kubogi final bosqichi yo‘llanmasini qo‘lga kiritib ulgurishgandi. Ushbu musobaqa 2019 yilning yozida Kamerunda bo‘lib o‘tadi. Unda 24 ta jamoa qatnashadi.