«River Pleyt» klubi Libertadores kubogi finalining javob bahsini Madridda o‘tkazishdan bosh tortishini ma’lum qildi. Jamoaning fikricha, o‘yin boshqa joyga ko‘chirilsa, chipta sotib olganlar bundan zarar ko‘radi, o‘z maydonida muxlislar qo‘llab-quvvatlashi borasidagi tenglikka putur yetadi.

«River Pleyt» o‘z e’tirozini quyidagicha bildirdi:

– 24 noyabr kuni bo‘lib o‘tishi kerak bo‘lgan o‘yin hududidan tashqaridagi xavfsizlik uchun shahar rahbariyati javobgar. Bo‘lib o‘tgan ishdan «River Pleyt» afsusda, ammo bu klub mas’uliyati doirasiga kirmaydi.

– Shanba kuni 66 ming muxlis uchrashuvning boshlanishini intizorlik bilan kutgandi. Yakshanba kuni ular yana stadionga kelishdi. O‘yin boshqa qit’aga ko‘chirilish munosabati bilan muxlislarni finalni jonli tomosha qilish imkoniyatidan mahrum qilish adolatdan emas.

– Argentina shu kunlarda G20 sammitini o‘zida qabul qilmoqda, ammo mamlakatning eng asosiy klasikosi boshqa joyda o‘tkazilishi — tushunarsiz. Argentina futbol assosiasiyasi va butun Argentina superklasikoning yurtimizda o‘tishiga to‘sqinlik qilishi kerak emas», – deyiladi «River»ning bayonotida.

Eslatib o‘tamiz, Libertadores kubogining dastlabki o‘yini "Boka Xuniors" maydonida o‘tkazilib, unda 2:2 hisobidagi durang qayd etilgandi. Buenos-Ayresdagi javob o‘yini kuni "River" muxlislari mehmon jamoa avtobusiga hujum uyushtirishi oqibatida avtobus oynalari sindi. Shisha siniqlari "Boka" futbolchilarining birining ko‘ziga kirib ketdi. Ishqibozlarni tarqatib yuborish uchun polisiya tomonidan qo‘llanilgan ko‘zdan yosh chiqaruvchi gaz avtobusdagi o‘yinchilarga salbiy ta’sir ko‘rsatdi. Natijada, dastlab o‘yin noma’lum muddatga qoldirildi, so‘ngra bahsni Argentinadan tashqarida o‘tkazish haqida qaror qabul qilindi. O‘yin sanasi bir necha marta ko‘chirildi. Yakunda esa finalning 9 dekabr kuni Madriddagi «Santyago Bernabeu» stadionida o‘tkazish haqida qaror qabul qilingandi.