O‘zbekiston Professional futbol ligasi bosh direktori o‘rinbosari Diyor Imomxo‘jayev kelasi mavsum ham Superligada legionerlar limiti o‘zgarmasligini e’lon qildi.

Lisenziyalash bo‘yicha reglamentni hamma ko‘rib ulgurgan bo‘lsa kerak. Unda aniq ko‘rsatib qo‘yilganki, o‘z futbol akademiyasiga va yaxshi maydonga ega bo‘lmagan futbol klublariga legioner futbolchilar xizmatidan foydalanish taqiqlanadi.

PFL kelasi mavsum uchun ham legioner futbolchilar limitini 4+1 ko‘rinishida saqlab qoladi. Bu limit Superliga va Pro-liga klublari uchun birdek amalda bo‘ladi. Agar akademiya va maydon masalasini tezroq hal qilmasa, hozirgi holatda “Nasaf” futbol klubidan boshqa birorta klub legioner futbolchilarni ro‘yxatda o‘tkaza olmaydi.

Bu holat birinchi navbatda AGMK, “Lokomotiv” va “Paxtakor” klublarini harakatga keltirishi kerak. Chunki ular Chempionlar ligasida ishtirok etadi. Hammasida maydon holati yaxshi. Biroq futbol akademiyasi masalasida klublar konkret bayonot berayotgani yo‘q. Agar ular 2019 yilgi mavsum startiga qadar ulgurmasliklariga ko‘zlari yetsa, O‘FAning ularga taklifi bor.

P.S. Futbol akademiyalari va yaxshi maydonlarni kerak deb bilguvchi OAV ham bu borada o‘z chiqishlari bilan ishtirok etishi maqsadga muvofiq. Chunki biz klublarning ichki muvaffaqiyatlarini ko‘rmoqdamiz, ammo poydevor masalasida cho‘zilish bor. Shuni tezlashtirish kerak.