Bugun, to‘g‘rirog‘i, ertaga tunda bizni «Enfild»da daxshatli match kutib turibdi. Keling, vijdonan aytalik, bugungi YECHL o‘yinlari orasida eng muhimi va eng qiziq o‘tishi kutilayotgan o‘yin - bu.

Klopp o‘z shogirdlariga «Bornmunt» jamoasi bilan o‘yinda asosiy tarkib o‘yinchilariga dam bergani yo‘q. Lekin «Liverpul» o‘sha o‘yinda ochiqchasiga kuch tejab o‘ynadi. Bugungi o‘yinning yana bir ahamiyatli tomoni shundaki, bu ikki jamoadan tashqari «PSJ»ning ham masalasi hali to‘la hal etilmagan. Ular «Srvena Zvezda» jamoasini yengishlari shart. Bu bir qarashda oson ko‘ringani bilan aslida unday emas. «Liverpul» – «Napoli» uchrashuvida har daqiqada o‘yin tizginini o‘zgartirishi mumkin. O‘yinning matematik sxemasini bundan avvalgi xabarlarda o‘qigan bo‘lishingiz kerak. Biz shunchaki bu o‘yinni ko‘rishingizni maslahat beramiz. Chunki bu o‘yindan olinadigan adrenalin balki YECHLning bu mavsumida boshqa bo‘lmas. Bugungi o‘yinni «Liverpul» katta kuch bilan hujumga o‘tib boshlasa ajab emas. Chunki tezkor gol uyda o‘ynayotgan jamoaga juda ham foydali. Bugungi o‘yinda durang ham «Napoli» uchun g‘alabaga teng. Shu sabab Italiyaliklar uchrashuvni o‘ta ehtiyotkorlik bilan boshlashsa kerak.

Jamoalarning taxminiy tarkibi bilan tanishing:

"Liverpul": Alisson, Van Deyk, Matip, Robertson, Veynaldum, Fabinyo, Keyta, Milner, Shakiri, Firmino, Saloh.
"Napoli": Meret, Luperto, Kulibaliy, G‘ulom, Maksimovich, Allan, Zelinski, InsinYE, Milik, Gamshik, Kalexon.

Mutaxassislar bugungi o‘yinda «Liverpul»da imkoniyat ko‘proq deb o‘ylashyapti. Ko‘p nashrlar bugun shu mavzuda maqolalar e’lon qildi. Yevropa matbuoti jamoalar imkoniyatini 60% - 40% deya baholashmoqda. Hammasini vaqt hal qiladi. Asosiysi, bugungi o‘yinni o‘tkazib yubormang!

Yahyoxo‘ja Ulug‘xo‘jayev