Бугун, тўғрироғи, эртага тунда бизни «Энфилд»да дахшатли матч кутиб турибди. Келинг, виждонан айталик, бугунги ЕЧЛ ўйинлари орасида энг муҳими ва энг қизиқ ўтиши кутилаётган ўйин - бу.

Клопп ўз шогирдларига «Борнмунт» жамоаси билан ўйинда асосий таркиб ўйинчиларига дам бергани йўқ. Лекин «Ливерпуль» ўша ўйинда очиқчасига куч тежаб ўйнади. Бугунги ўйиннинг яна бир аҳамиятли томони шундаки, бу икки жамоадан ташқари «ПСЖ»нинг ҳам масаласи ҳали тўла ҳал этилмаган. Улар «Црвена Звезда» жамоасини енгишлари шарт. Бу бир қарашда осон кўрингани билан аслида ундай эмас. «Ливерпуль» – «Наполи» учрашувида ҳар дақиқада ўйин тизгинини ўзгартириши мумкин. Ўйиннинг математик схемасини бундан аввалги хабарларда ўқиган бўлишингиз керак. Биз шунчаки бу ўйинни кўришингизни маслаҳат берамиз. Чунки бу ўйиндан олинадиган адреналин балки ЕЧЛнинг бу мавсумида бошқа бўлмас. Бугунги ўйинни «Ливерпуль» катта куч билан ҳужумга ўтиб бошласа ажаб эмас. Чунки тезкор гол уйда ўйнаётган жамоага жуда ҳам фойдали. Бугунги ўйинда дуранг ҳам «Наполи» учун ғалабага тенг. Шу сабаб Италияликлар учрашувни ўта эҳтиёткорлик билан бошлашса керак.

Жамоаларнинг тахминий таркиби билан танишинг:

"Ливерпуль": Алиссон, Ван Дейк, Матип, Робертсон, Вейналдум, Фабиньо, Кейта, Милнер, Шакири, Фирмино, Салоҳ.
"Наполи": Мерет, Луперто, Кулибалий, Ғулом, Максимович, Аллан, Зелиньски, Инсинье, Милик, Гамшик, Калехон.

Мутахассислар бугунги ўйинда «Ливерпуль»да имконият кўпроқ деб ўйлашяпти. Кўп нашрлар бугун шу мавзуда мақолалар эълон қилди. Европа матбуоти жамоалар имкониятини 60% - 40% дея баҳолашмоқда. Ҳаммасини вақт ҳал қилади. Асосийси, бугунги ўйинни ўтказиб юборманг!

Яҳёхўжа Улуғхўжаев