Respublikamizning turli hududlarida Jismoniy tarbiya va sportni rivojlantirish jamg‘armasi mablag‘lari hisobidan bunyod etilgan yangi sport inshootlari foydalanishga topshirilgani haqida xabar bergan edik.

Shu kabi zamonaviy sport inshootlari Bulung‘ur tumanida ham foydalanishga topshirildi. Tumandagi bolalar-o‘smirlar sport maktabiga yangi 18x42 hajmda universal sport zali qurildi hamda “Mingchinor” o‘yingohi kapital rekonstruksiya qilindi.

Sport inshootining tantanali ochilish marosimida O‘zbekiston Respublikasi Jismoniy tarbiya va sport vaziri o‘rinbosari SH.Mo‘minjonov, O‘zbekiston Respublikasi Jismoniy tarbiya va sportni rivojlantirish jamg‘armasi ijrochi direktori I.Mirzayev, Samarqand viloyati hokimining o‘rinbosari R.Qobilov, Samarqand viloyati jismoniy tarbiya va sport boshqarmasi boshlig‘i SH.Ro‘ziyevlar ishtirok etdi.

Foydalanishga topshirilgan ushbu sport inshootlari kelajakda yoshlarni sportga bo‘lgan qiziqishlarini orttirib, ularni nufuzli xalqaro sport musobaqalarida ishtirok etishlarida poydevor bo‘lishi hamda tumani aholisini sog‘lomlashtirishga xizmat qilishi ta’kidlandi.

Sport inshootini qurish va kapital ta’mirlash ishlari “Temir qalqon” MCHJ tomonidan amalga oshirildi hamda muassasa Jismoniy tarbiya va sportni rivojlantirish jamg‘armasi tomonidan zarur sport inventarlari bilan jihozlandi.

Ayni paytda, sport maktabida 23 nafar murabbiylar qo‘l ostida 1000 nafarga yaqin yoshlar 13 ta sport turi sport bilan muntazam shug‘ullanmoqda.