Avval xabar berib o‘tganimizdek, futbol bo‘yicha O‘zbekiston ayollar Olimpiya terma jamoasi oldiga ham Tokio 2020 Olimpiadasi lisenziyasini qo‘lga kiritish vazifasi qo‘yilgandi.   Shu maqsadda terma jamoa uchun yetarli shart-sharoitlar yaratib berilmoqda. Ayni paytda qizlarimiz Toshkent viloyatidagi «Chorvoq» oromgohida tayyorgarlikning ikkinchi bosqichini olib borishmoqda.   Mazkur o‘quv-mashg‘ulot yig‘inlarini tashkil etishdan maqsad terma jamoa uchun nomzodlarni yana bir marotaba sinovdan o‘tkazish, ularning funksional holatini tekshirish va jismoniy tayyorgarlikni kuchaytirishdan iboratdir. Bundan tashqari futbolchi qizlarimizning ruxiy tayyorgarligiga ham yig‘in davomida alohida e’tibor qaratiladi.   Bungacha terma jamoa tayyorgarlikning birinchi bosqichini 5-15 yanvar kunlari poytaxtimizdagi «Chig‘atoy» sport bazasida olib bordi. Hozirda «Chorvoq» oromgohida o‘tkazilayotgan yig‘in esa 19 yanvar – 9 fevral kunlariga mo‘ljallangan. Tayyorgarlikning uchinchi (10-15 fevral) va to‘rtinchi (20-24 fevral) bosqichi «Chig‘atoy» sport bazasida davom ettiriladi. So‘ngra qizlarimiz beshinchi bosqich doirasida 25-fevral – 6 mart kunlari Turkiyadagi xalqaro musobaqada ishtirok etadilar. Qolaversa, 15-21 mart kunlari Jizzaxda ham xalqaro turnir tashkil etilishi ko‘zda tutilgan.   1-12 aprel kunlari esa Olimpiya o‘yinlariga saralash turnirining navbatdagi bosqichi bo‘lib o‘tadi. Mazkur o‘yinlar katta ehtimol bilan Toshkent shahrida o‘tkaziladi. 13 fevral kuni tashlanadigan qur’ada terma jamoamizga raqiblik qiladigan mamlakatlar nomi ma’lum bo‘ladi.   Shuni alohida qayd etish lozimki, ayni paytda «Chorvoq» oromgohida davom etayotgan yig‘inda terma jamoamiz bilan birga yengil atletika bo‘yicha mutaxassis ishlamoqda. Aynan u qizlarimizning jismoniy holatini kuchaytirish bo‘yicha o‘z tavsiyalarini berib turibdi. Bugun yig‘inda qatnashayotgan futbolchilarning funksional tayyorgarligi tekshirildi.   Eslatib o‘tamiz, terma jamoamiz yig‘inda quyidagi tarkibda ishtirok etmoqda:   Darvozabonlar: Maftuna Jonimkulova – «Sevinch» Gulandon Boymatova – «Metallurg»   Himoyachilar: O‘g‘iloy Qo‘chqorova – «Bunyodkor» Dilrabo Asadova – AGMK Soliha Husniddinova – «Bunyodkor» Xolida Dadaboyeva – «Metallurg» Dilnoza Bektemirova – «Bunyodkor» Feruza Boboxo‘jayeva – «Sevinch» Maftuna Shoyimova – «Sevinch» Tanzilya Zarbiyeva – «Sevinch» Aziza Norboyeva – «So‘g‘diyona»   Yarim himoyachilar: Dildora Nozimova – «Metallurg» Umida Zoirova – «Bunyodkor» Feruza Turdiboyeva – «Metallurg» Fazilat Bahromova – «Sho‘rtan» Rushaniya Safina – «Metallurg» Malika Burxonova – «Sevinch» Maftuna Panjiyeva – «Sevinch»   Hujumchilar: Nilufar Qudratova – «Sevinch» Shaxnoza Qurbonova – «Sevinch» Diyora Xabibullayeva – «Metallurg» Kamola Berdiyeva – «Lokomotiv» Nilufar Dadajanova – «Andijanka»   Bosh murabbiy: Bahrom Norsafarov Katta murabbiy: Gulnora A’zamova.