Xabaringiz bor, O‘zbekiston futbol assosiasiyasi tomonidan Yevropaning futboli rivojlangan mamlakatlar futbol federasiyalari bilan yaqin aloqalar o‘rnatib, o‘zbek futboli rivoji yo‘lida ularning boy tajribasidan unumli foydalanish maqsadida bir qator chora-tadbirlarni amalga oshirib kelishmoqda.    Jumladan, O‘FA 1-vise-prezidenti Umid Ahmadjonovning maslahatchisi San’at Sharipov, Terma jamoalar departamenti direktori Sharofiddin Hojiniyozov Gresiya va Germaniya futbol federasiyalari vakillari bilan uchrashib, hamkorlik bo‘yicha kelishuvga erishishgani haqida avval xabar berib o‘tgandik.    Bugun O‘FA mutasaddilari Chexiya futbol federasiyasida bo‘lishdi. U yerda Chexiya futbol federasiyasi mintaqaviy akademiyalar bilan ishlash bo‘limi boshlig‘i, Chexiya futbolining o‘tmishdagi yulduzi, terma jamoaning sobiq futbolchisi Karel Poborskiy va Murabbiylar ta’limi departamenti direktori Lukash Rujichka bilan uchrashishdi.    Karel Poborskiyni futbol muxlislari "Benfika", "Lasio", "Manchester Yunayted" kabi jamoalardagi faoliyati orqali yaxshi tanishadi. U Chexiya terma jamoasi tarkibida 118ta o‘yinda maydonga tushib, 8ta gol kiritishga ham muvaffaq bo‘lgan. 1996 yil Yevropa chempionatida vise-chempionlikka erishgan.   Uchrashuv davomida Chexiyada yo‘lga qo‘yilgan bolalar futboli tizimi, akademiyalar ish tartibi muhokama qilindi va bu tajribani O‘zbekistonda qo‘llash masalalari gaplashib olindi. Shuningdek, kelgusida ikki mamlakatning U-15, U-17 terma jamoalari o‘rtasida o‘rtoqlik o‘yinlari o‘tkazish bo‘yicha ham kelishuvga erishildi. Bundan tashqari, Lukash Rujichka Toshkentga tashrif buyurib, mamlakatimizdagi bolalar va o‘smirlar futbol akademiyalari murabbiylari malakasini oshirish bo‘yicha turli seminarlar va o‘quv kurslari o‘tkazishga va’da berdi.    Kelasi yilning may oyida Chexiyada yoshlar terma jamoalari ishtirokida Xalqaro musobaqa bo‘lib o‘tadi. Chexiya futbol federasiyasi tomonidan O‘zbekiston yoshlar terma jamoasi ham mazkur musobaqaga taklif etildi.    Uchrashuv yakunida Chexiya futbol federasiyasi vakillariga esdalik sovg‘alari berildi.