O‘zbek futbolining taniqli va tajribali mutaxassislaridan biri Samvel Babayan “Lokomotiv” futbol klubida faoliyat olib boradi. Samvel Vyacheslavovich “Lokomotiv” professional futbol klubi prezident maslahatchisi etib tayinlandi.
Futbol muxlislariga yaxshi ma’lum, Samvel Babayan asosan “Paxtakor” futbol klubidagi bir necha yillik faoliyati orqali keng jamoatchilikka tanilgan. Uning katta tajribasi hamda o‘zbek futbolidagi samarali mehnatini inobatga olib “Lokomotiv” PFK rahbariyati ishga taklif etdi.
Samvel Babayan “Paxtakor”dagi faoliyati davomida ko‘plab yutuqlarni qo‘lga kiritgan. U rahbarlik qilgan yillari “Paxtakor” 9 bor mamlakat milliy chempionati hamda 8 marta O‘zbekiston Kubogi g‘olibi deb topilgan. Bundan tashqari “Paxtakor”ning ikki bor (2002/2003, 2004) Osiyo chempionlar ligasi yarim finaliga yetib borishida, 2002 yil mavsum yakunlariga ko‘ra “Osiyoning eng yaxshi futbol klubi” deb topilishida, shuningdek MDH Kubogining 2007 yilgi musobaqasida chempion bo‘lishi hamda keyingi yil finalga qadar yetib borishida qo‘shgan hissasi katta.
Bundan tashqari Samvel Babayan O‘zbekiston milliy terma jamoasi bosh murabbiyi sifatida ham samarali mehnat qilgan va uning qo‘l ostida 42 nafar futbolchi mamlakat bosh jamoasida o‘z debyutini nishonlagan. Shuningdek, Samvel Vyacheslavovich turli yillarda O‘zbekistonning olimpiya, yoshlar va o‘smirlar terma jamoalariga “Paxtakor” menejeri sifatida 200ga yaqin futbolchilarni tarbiyalab bergan. Yana shuni ta’kidlash joiz, Samvel Babayan o‘zbek futboliga qo‘shgan ulkan hissasi tufayli ikki bor O‘zbekistonning “Eng yaxshi murabbiyi” deb topilgan.
O‘ylaymizki, shunday mutaxassisning katta tajribasi endilikda “Lokomotiv” futbol klubining ham yangi bosqichga chiqishida qo‘l keladi. Samvel Babayan oldiga “Lokomotiv” PFK prezidenti Radjapov Mansur Kuchkarovich tomonidan quyidagi asosiy vazifalar belgilab qo‘yildi:
1. Klub infratuzilmasini ko‘tarish hamda yangi bosqichga olib chiqish;
2. “Lokomotiv” bolalar va o‘smirlar futbol maktabini rivojlantirish va zamonaviy faoliyat yuritishini yo‘lga qo‘yish;
3. Klub material-texnik bazasini yanada shakllantirish hamda buning uchun kerakli barcha chora-tadbirlarni amalga oshirish.
“Lokomotiv” futbol klubi uchun Samvel Babayandek yetuk futbol mutaxassisini o‘zaro hamkorlik asosida ish yuritishga taklif etish katta sharaf hisoblanadi hamda u kishining keyingi faoliyatiga omad tilab qolamiz.
