Coca Cola Superligasi 1-tur doirasidan o‘rin olgan “Navbahor” – “Qo‘qon-1912” bahsi ertaga Toshkentdagi TTYMI stadionida bo‘lib o‘tadi. “Vodiy derbisi” oldidan ushbu jamoalarning o‘zaro o‘yinlardagi statistik ma’lumotlari bilan tanishtirib o‘tamiz.
O‘zaro o‘yinlar
“Qo‘qon-1912” hamda “Navbahor” klublari shu kungacha 26 bor kuch sinashishgan. 6 ta uchrashuvda “Qo‘qon-1912”ning qo‘li baland kelgan. “Navbahor” 16 ta o‘yinda g‘alaba qozongan. 4 ta o‘yinda durang natija qayd etilgan. To‘plar nisbatida ustunlik “lochinlar” tomonida: 53-28. “Navbahor” o‘zaro o‘yinlarda 52 ochkoga ega bo‘lgan, “Qo‘qon-1912” esa 22 ochkoni qo‘lga kiritgan.
O‘tgan mavsumdagi o‘yinlar
Ushbu jamoalar o‘tgan mavsumdagi o‘yinlarda bir martadan g‘alaba qozonishgan. Qo‘qondagi bahsda mezbonlarning qo‘li baland kelgan bo‘lsa, Namangandagi uchrashuvda ham maydon egalari g‘alaba qozonishgan.
Sobiq o‘yinchilar
O‘tgan mavsumdagi “derbi”larda jamoamiz sharafini himoya qilgan – O‘tkir Yusupov va G‘iyos Komilovlar endi qo‘qonliklarga qarshi maydonga tushishlari mumkin. Sobiq o‘yinchilar haqida gap ketganda, “Qo‘qon-1912” jamoasida tanilgan Igor Golbanni ham qayd etish lozim. Rossiyalik futbolchining O‘zbekistondagi birinchi o‘ynagan jamoasi – “Qo‘qon-1912” klubi bo‘ladi.
Kimning transfer narxi baland?
Germaniyaning Transfermarkt.de portali futbolchilarning taxminiy transfer narxini e’lon qilib borishidan xabaringiz bor. Ushbu saytning ma’lumotiga ko‘ra, “Qo‘qon-1912” jamoasining umumiy transfer narxi 4,15 million yevroga baholgan. Tarkibimizdagi eng transferi yuqori bo‘lgan futbolchi Murod Xolmuhamedov bo‘lib turibdi. Uning taxminiy transfer narxi 500 ming yevroga teng.
Raqibimiz “Navbahor”ning umumiy transfer narxi esa 6,13 million yevroga baholangan. Namanganliklar tarkibidagi eng qimmat futbolchi – Igor Golban bo‘lib, uning taxminiy transfer narxi 900 ming yevroni tashkil etmoqda.
Boshlanish vaqtlari
“Qo‘qon-1912” – “Navbahor” uchrashuvi, ertaga Toshkent shahridagi TTYMI stadionida soat 15:00 da start oladi. Bugun esa ushbu jamoalarning o‘rinbosarlari U-21 birinchiligi 1-turida maydonga tushishadi. Mazkur uchrashuv Qibraydagi stadionda o‘tkaziladi. Bahsning boshlanish vaqti – 14:00ga belgilangan.
