Xorazm viloyatida badminton bo‘yicha 11 yoshdan 16 yoshgacha bo‘lgan o‘g‘il-qizlar o‘rtasida O‘zbekiston chempionati boshlandi.
Bugun 29 mart kuni Urganch shahridagi “Badminton sport markazi”da chempionatning ochilish marosimi bo‘lib o‘tdi. Tantanali tadbirda Xorazm viloyati hokimi F.Ermanov, viloyat jismoniy tarbiya va sport boshqarmasi boshlig‘i SH.Madaminov, Respublika badminton federasiyasi vakillari, va sport jamoatchiligi ishtirok etishdi.
Ta’kidlash joiz, musobaqada mamlakatimizning turli hududlaridan 150 nafarga yaqin yosh badmintonchilari o‘zaro bahs olib borishadi.
Chempionat davomida federasiya mutasaddilari va terma jamoa murabbiylari O‘zbekiston yoshlar jamoasi yangi tarkibi uchun nomzod sportchilarni tanlab olishni maqsad qilishgan.
Dasturga ko‘ra, sportchilar bir necha bosqichda bo‘lib o‘tadigan jamoaviy, yakkalik, juftlik va aralash bahslarda o‘z imkoniyatlarini sinovdan o‘tkazishadi.
Yakuniy natijalarga ko‘ra sovrinli o‘rinlarni egallaganlar O‘zbekiston terma jamoasiga qabul qilinishi belgilangan.
Chempionat qatnashchilari va mehmonlarining bo‘sh vaqtlarini mazmunli tashkil qilish maqsadida Xorazm viloyati turizmni rivojlantirish departamenti tomonidan viloyatdagi sayyohlik ob’ektlari bo‘ylab ekskursiyalar tashkil etish ham rejalashtirilgan.