“Metallurg” – “Buxoro” uchrashuvidan so‘ng mezbonlar ustozi Andrey Shipilov quyidagicha fikr bildirdi:
- Mavsumdagi ilk uy uchrashuvi bo‘lgani sabab bu o‘yinning mas’uliyati o‘zgacha edi. Qolaversa, ushbu raqibimiz ham o‘ziga yarasha kuchli jamoa edi. Ular 1-turda ancha yaxshi o‘yin namoyish etib, Olmaliqda raqibni o‘z jarima maydonchasi yaqinida o‘ynashga majbur qila olgan edi. Biz raqibni yaxshi o‘rgangan holda, aynan mana shu jihat ustida ishlab, mazkur o‘yinga hozirlik ko‘rgan edik. “Buxoro” bugun ham o‘yinni yaxshi boshladi.
Biroq 33-daqiqaga kelib, biz raqibning nozik jihatini topa oldik va raqib darvozasini ishg‘ol eta oldik. Lekin butun bahs davomida maydonda ancha shiddatli kurash kechganini ta’kidlay olaman. Bugun yomg‘irli havo bo‘lishiga qaramasdan stadionga tashrif buyurgan ishqibozlardan ham minnatdormiz, - dedi murabbiy.
