Superliganing 4-tur doirasida  Namanganning “Navbahor” klubi Qarshida “Nasaf” jamoasi mehmoni bo‘ladi.

Mazkur klublar shu kungacha milliy chempionatlarimiz tarixida o‘zaro 44 marta ro‘baro‘ kelishgan. Ushbu o‘yinlarning 22 tasida “ajdarlar”ning qo‘li baland kelgan bo‘lsa, 11ta uchrashuvda “lochinlar” g‘alaba qozonishgan,  11ta bahsda esa jamoalar murosa ko‘chasini tanlashgan. To‘plar nisbati – 76-61, “Nasaf” foydasiga.

O‘zaro uchrashuvlarda “Nasaf” 77 ochkoni,  “Navbahor” esa 44 ochkoni qo‘lga kiritgan. Ushbu klublar o‘rtasidagi o‘yinlardagi eng yirik - 6:0 hisobi  Namanganda va Qarshida qayd etilgan.

“Nasaf” hamda “Navbahor” jamoalari bungacha Qarshida 22 marta kuch sinashishgan. Mazkur bahslarning 18 tasida qarshiliklar zafar quchishgan bo‘lsa, 2ta uchrashuvda namanganliklar g‘alaba qozonishgan, 2ta o‘yinda esa durang qayd etilgan.

Qarshida o‘tkazilgan o‘zaro uchrashuvlarda “ajdarlar” “Navbahor” darvozasini 52 marta ishg‘ol etishgan bo‘lsa, “lochinlar” “Nasaf” darvozasiga  19ta to‘p kiritishgan.

Qarshida bo‘lib o‘tgan  o‘zaro o‘yinlarda “Navbahor” “Nasaf”ni oxirgi marta 1999 yili mag‘lubiyatga uchratgan. 2018 yili Qarshida o‘tkazilgan uchrashuvda esa tomonlar murosa ko‘chasini tanlashgan.