Ma’lumki, 18 may kuni Germaniya chempionatining so‘nggi tur o‘yinlari o‘tkaziladi va shu kuni joriy mavsum chempioni nomiga oydinlik kiritiladi.

Ayni vaqtda Myunxenning «Bavariya» klubi (75 ochko) va Dormundning «Borussiya»si (73 ochko) Bundesliganing bosh sovrini uchun kurashmoqda.

Bild nashrining xabariga ko‘ra, Bundesliga chempioniga topshiriladigan sovrin – «kumush tovoq»ning haqiqiysi Myunxenga olib boriladi. Bu yerda «Bavariya» «Ayntraxt» bilan kuch sinashadi.

«Borussiya» (Dormund) esa safarda o‘z «adashi» - Menxengladbaxning «Borussiya»ga qarshi maydonga tushadi va bu o‘yinda «kumush tovoq»ning nusxasidan foydalaniladi.

So‘nggi turda vaziyat dormundliklar tomoniga og‘ib, «Borussiya» chempion bo‘lsa, jamoaga sovrinning nusxasi topshiriladi va keyinroq u haqiqiysiga almashtirib beriladi. Ta’kidlash lozim, ayni paytda chempionlikka da’vogar ikki jamoani atigi ikki ochko ajratib turibdi.