Xabaringiz bor, ertaga Buyuk Britaniyaning Manchester shahrida taekvondoning WT yo‘nalishi bo‘yicha kattalar o‘rtasidagi jahon chempionati start oladi. Barcha sport turlarida bo‘lgani singari bu yirik musobaqadan avval Xalqaro federasiyaning Bosh assambleyasi tashkil qilindi. Mazkur tadbirda O‘zbekiston Milliy olimpiya qo‘mitasi va O‘zbekiston taekvondo assosiasiyasi vakillari ham bevosita ishtirok etishmoqda.

Assambleyaning birinchi qismida kun tartibiga qo‘yilgan asosiy mavzu taekvondo sportining butun dunyo bo‘ylab ommalashuvini yanada kengaytirish va Xalqaro federasiyaning moliyaviy holati bo‘ldi. Kunning birinchi yarmida mana shu masalalarga alohida urg‘u berildi va dastlab Xalqaro federasiya moliya bo‘limining audit hisoboti tinglandi. Shuningdek, yangi mavsum uchun Xalqaro taekvondo WT federasiyasi byudjeti tasdiqlandi.

Ayni paytda Bosh Assambleya yig‘ilishi o‘z ishini davom ettirmoqda. Kun davomida janglar paytida sportchilarning harakatini baholashda kiritiladigan o‘zgarishlar, Xalqaro federasiya bayrog‘i ostida o‘tadigan musobaqalarning tashkiliy jihatlar borasidagi yangiliklari, shuningdek, yaqin yillar ichida o‘smirlar, yoshlar va kattalar miqyosidagi musobaqalarga mezbonlik qiluvchi shaharlarni aniqlash kabi masalalar ham muhokamaga qo‘yiladi.

Qolaversa, Bosh Assambleya davomida xalqaro federasiyaning Ijroqo‘m, tibbiy va texnik qo‘mitalarining hisoboti tinglanib, bu yil Italiyaning Neapol shahrida bo‘lib o‘tadigan yozgi Universiada o‘yinlari va Tokio Olimpiadasiga ko‘rilayotgan tayyogarlik yuzasidan taqdimot namoyish etilishi ham belgilab qo‘yilgan.

Ma’lumot uchun, Bosh Assambleya yig‘ilishida mamlakatimiz nomidan O‘zbekiston Milliy olimipiya qo‘mitasi prezidenti maslahatchisi Nazirjon Xudoyqulov hamda O‘zbekiston taekvondo assosiasiyasi Bosh kotibi Abduazim Isroilovlar ishtirok etishmoqda.