«Real» rahbariyati «Santyago Bernabeu» arenasi rekonstruksiyasi uchun 575 mln. yevro ajratadi, lekin bu klubning transferlar masalasidagi ishlariga aslo ta’sir o‘tkazmaydi. Top darajadagi yangi futbolchilar hisobiga jamoa tarkibini qayta shakllantirish - bu bosh murabbiy Zayniddin Zidan oldida turgan asosiy vazifa. Fransiyalik mutaxassis shunday talab bilan qaytishga ko‘ngan va endi Florentino Peres murabbiyga bergan va’dasini bajarishi kerak...
Alohida aytish kerak, «Madrid» transferlar bozori ochilishidan oldin chamasi 100 mln. yevro sarflashga ulgurdi. Ya’ni markaziy himoyachi Militao va istiqboli baland braziliyalik vinger Rodrigoning «Santyago Bernabeu»ga ko‘chib o‘tishlari aniq. Klubning yozgi savdolar start olguniga qadar yana 1-2ta transferni rasmiylashtirishi ehtimoli katta. Deylik, Sky Sports nashri ma’lumotlariga ko‘ra, «Real» rahbariyati «Ayntraxt» hujumchisi Luka Yovich transferini hal qilib qo‘ydi. Qo‘shimcha ma’lumot: madridliklar serbiyalik yosh goleador uchun nemis klubiga 60 - 70 mln. yevro to‘lashadi. Darvoqe, umumiy summaning 30 foizi «Benfika»ga nasib etadi. Shuningdek, «Real» Eden Azar transferini 29 maygacha bir yoqli qiladi. Lekin bular hammasi emas... To‘g‘ri, yozgi bozor byudjeti xususida ma’lumot yo‘q (ko‘pchilikning fikricha, Peresning aynan qancha ajratishi klubdan ketadigan futbolchilar sotuvidan tushadigan summaga bog‘liq). Lekin bu borada taxminlar bor, albatta. Xususan, Fransiyaning Le10Sport nashrida yozilishicha, Zidan tarkibni kuchaytirish uchun 450 mln. yevro oladi. The Mirror esa byudjet biroz balandroq ekanligini ta’kidlamoqda - 500 mln. yevro. «Real»ga eng yaqin media - Marca gazetasining o‘tgan yil oxirida Zidanga 300 mln. yevro ajratilishi haqida yozganini ham eslatish o‘rinli.
«REAL»NING yozgi vazifalari
Markaziy himoyachi
Militao («Portu») - 50 mln. yevro
Chap qanot himoyachisi
Mendi («Lion») - 50 mln. yevro
Markaziy yarim himoyachi
Pogba («MYU») - 200 mln. yevro
yoki
Eriksen («Tottenxem») - 150-200 mln. yevro
yoki
Van de Beek («Ayaks») - 60 mln. yevro
Hujumchilar
Rodrigo («Santos») - 45 mln. yevro
Yovich («Ayntraxt») - 60-70 mln. yevro
Azar («Chelsi») - 100 mln. yevro
