Portugaliya terma jamoasi Millatlar ligasi finali oldidan mashg‘ulot o‘tkazdi. Jamoa avtobusga o‘tirib, stadiondan mehmonxona tomon yo‘lga chiqayotganidan, 11 yoshli bola: «Krishtianu Ronaldu, meni quchoqla», deya yozilgan banner ko‘tarib olgan edi.
Hujumchi bolani ko‘rib qoldi va haydovchidan avtobusni to‘xtatishni so‘radi. Shundan so‘ng Krishtianu bolani avtobusga taklif qildi va u bilan suratga tushdi.
A Bola nashri tarqatgan xabarga ko‘ra, bolaning ismi Eduardo Moreyra. U leykemiya kasaliga chalingan.
Portugaliya terma jamoasi bugun, 9 iyun kuni Gollandiyaga qarshi Millatlar ligasi final bahsida maydonga tushadi. O‘yin Toshkent vaqti bilan 23:45da boshlanadi.
