Xabaringiz bor, yaqindagina yurtimiz va xorijning bir qancha klublarida muvaffaqiyatli faoliyat olib borgan tajribali yarim himoyachi Azizbek Haydarov futbolchilik faoliyatini yakunlagani haqida e’lon qildi. O‘zbekiston terma jamoasida ham uzoq yillar to‘p surgan futbolchining keyingi faoliyati ham mamlakatimiz bosh jamoasi bilan bevosita bog‘liq bo‘ladi. Azizbek Haydarov O‘FA terma jamoalar bo‘limida ish boshlamoqda. Unga turli yoshdagi barcha terma jamoalar ishini muvofiqlashtirish kabi mas’uliyatli vazifa topshirildi.

Haydarov bilan bir davrda terma jamoada to‘p surgan o‘zbek futbolining yana bir afsonaviy vakili, uchrashuvlar soni va titullar bo‘yicha O‘zbekistonda rekordchilardan biri hisoblangan Timur Kapadze ham O‘FA tizimida ish boshladi. Avval milliy terma jamoada vaqtinchalik murabbiy sifatida ishlab, keyinchalik “Lokomotiv” klubi o‘rinbosarlar tarkibiga murabbiylik qilgan Kapadze, to‘plagan tajribasini seleksiya ishlariga yo‘naltiradi. O‘FAning seleksiya ishlari aynan Timur Kapadze zimmasiga yuklanadi.

Shu kungacha futbolchi sifatida yurtimiz sharafini himoya qilgan ushbu mutaxassislar o‘z bilim va ko‘nikmalarini o‘zbek futboli ravnaqi yo‘lida sarflashga kirishmoqdalar.

Assosiasiya rahbariyati ularga yuksak ishonch bildiradi va omad tilaydi!