Bolgariyaning Sofiya shahrida sport kurashlari bo‘yicha o‘smirlar o‘rtasida jahon chempionati o‘z yakuniga yetib bormoqda. Bugungi kun doirasida yunon-rim kurashi bo‘yicha bir qator vazn toifalarida g‘olib va sovrindorlar nomi aniqlab olindi.
E’tiborlisi, ushbu kun dasturida terma jamoamiz vakili Abror Atabayev -55 kilogramm vazn toifasida bronza medalini qo‘lga kiritdi. Yurtdoshimiz yarim finalda musobaqaning bo‘lajak g‘olibi ozarbayjonlik Nihat Mammadaliga imkoniyatni boy berib qo‘ygan edi. Bronza medali uchun kurashda esa turkiyalik Seyitchan Beytekindan ustun keldi.
Bugun o‘tkazilgan so‘nggi saralash bellashuvlari yakuniga ko‘ra Asad Bahromov (-49 kg.) final yo‘llanmasini qo‘lga kiritdi. Uning oltin medal uchun kurashdagi raqibi qozog‘istonlik Samatbek Izimgali bo‘ladi. Shuningdek, ertaga Amirbek Sultonov (-60 kg.) bronza medali uchun o‘tish bellashuvida ishtirok etadi.