Xabaringiz bor, bugun poytaxtimizda taekvondoning WT yo‘nalishi bo‘yicha kadetlar o‘rtasida jahon chempionati start oldi. “Universal” sport saroyi mezbonlik qilayotgan musobaqa yurtimiz va xalqaro sport jamoatchiligining diqqat-e’tiborida bo‘lib turibdi. Musobaqa ochilish marosimidan avval jahon taekvondo federasiyasi rahbari Chung Von Choy hamda O‘zbekiston Respublikasi Bosh vazir o‘rinbosari Aziz Abduhakimov ishtirokida uchrashuv bo‘lib o‘tdi. Unda, shuningdek, Milliy olimpiya qo‘mitasi prezidenti Rustam Shoabdurahmonov, Jismoniy tarbiya va sport vaziri Dilmurod Nabiyev ham ishtirok etdilar.
Uchrashuv davomida yurtimizda taekvondo sporti taraqqiyotini yangi bosqichga olib chiqish, diyorimizda bu kabi yirik xalqaro musobaqalarni ko‘proq o‘tkazish kabi masalalar xususida muzokara olib borildi. Shuningdek, Chung Von Choy O‘zbekiston Milliy universitetida taekvondo fakultetining tashkil etilishi va sportchilarimiz xalqaro maydonda qayd etayotgan natijalar Prezidentimiz tomonidan ushbu sportga ko‘rsatilayotgan katta e’tibor namunasi ekanligini ta’kidlab o‘tdi. Uchrashuv yakunida Aziz Abduhakimov martabali mehmonga esdalik sovg‘alarini topshirdi.
Shundan so‘ng barchaning nigohi musobaqaning tantanali ochilish marosimiga qaratildi. Unda Chung Von Choy va Aziz Abduhakimov so‘zga chiqib, ushbu jahon chempionatining yuqori saviyada tashkil etilganligiga alohida urg‘u berib o‘tishdi.
Martabali mehmonlar tomonidan musobaqa ochiq deb e’lon qilingach, an’anaga muvofiq sporchti, murabbiy va hakamlar nomidan bir nafardan vakil so‘zga chiqib, bellashuv davomida halol raqobat olib borishga qasamyod qabul qilishdi.
Shundan so‘ng marosimning badiiy qismiga navbat berildi. Unda Janubiy Koreyadan kelgan yosh taekvondo jamoasi o‘zlari tayyorlab kelgan chiqishlar bilan muxlislar olqishiga sazovor bo‘ldilar. Shuningdek, o‘zbek-koreys madaniyatini birlashtiruvchi kuy-qo‘shiq va raqslar ham tomoshabinlarning diqqat-markazida bo‘ldi.
Tantanali ochilish marosimi yakunlangach musobaqaning birinchi kun dasturidan o‘rin olgan final janglari boshlandi.
