Poytaxtimizda o‘tkazilayotgan taekvondo bo‘yicha kadetlar o‘rtasidagi jahon chempionati yurtimizda ushbu sport turi rivoji va taraqqiyoti, ommaviy sport targ‘iboti yo‘lida o‘zgacha iz qoldirmoqda.
Musobaqani kuzatib borish uchun shaxsan jahon taekvondo federasiyasi rahbarining tashrifi mazkur turnir ne chog‘lik ahamiyat kasb etishini belgilab bermoqda.
O‘zbekiston taekvondo assosiasiyasi ushbu musobaqa doirasida yana bir ahamiyatli tadbirga qo‘l urdi. Bugun poytaxtimizdagi “Xalqlar do‘stligi” maydonida, avvalo, sog‘lom turmish tarzini, shuningdek, taekvondoni targ‘ib qilish yo‘lida katta fleshmob tashkil qilindi. Unda ushbu sport turida katta yutuqlarga erishgan hamyurtlarimiz, yuzlab mahalliy va Janubiy Koreyadan kelgan yosh taekvondochilar o‘z mahoratlarini namoyish qilishdi. Fleshmobda jami 2019 nafar ishtirokchi qatnashdi.
