Toshkent mezbonlik qilgan taekvondo bo‘yicha kadetlar o‘rtasidagi jahon chempionati o‘z yakuniga yetdi. To‘rt kun davom etgan dunyo birinchiligida sayyoramizning 70 ga yaqin mamlakatidan 850 nafarga yaqin yosh sportchilar g‘oliblik uchun bahs olib bordi. 20 nafar sportchi bilan ishtirok etgan O‘zbekiston terma jamoasi esa mazkur musobaqa yakunida 1 tadan oltin va bronza medallarini qo‘lga kiritdi.
Dastlab, -33 kilogramm vazn toifasida Muhammadamin Aliyev yarim finalgacha yetib borib, terma jamoamiz uchun mazkur musobaqadagi dastlabki medalni taqdim qilgan bo‘lsa, ertasi kun -41 kilogrammda Zafarbek Karimov barcha raqiblarini mag‘lubiyatga uchratib, jahon chempionatining oltin medaliga sazovor bo‘ldi. Qolaversa, ushbu taekvondochimiz jahon chempionatining eng yaxshi sportchisiga atalgan sovrinni ham qo‘lga kiritdi.
Musobaqa davomida 4 nafar sportchimiz afsuski, yarim final uchun kechgan bahsda imkoniyatni boy berdi. Shuningdek, 12 nafar vakilimiz 1/8 final, yana ikki taekvondochimiz esa musobaqani 1/16 finalda yakunlashdi.
Oldingi uchta jahon chempionatida o‘zbekistonlik taekvondochilar jami 7 ta bronza medaliga ega chiqishgandi. Bugungi kunga kelib, kadetlar o‘rtasidagi jahon chempionatida yurtimiz sportchilarining jami medallari soni 9 taga yetdi. Ulardan bittasi oltin, qolgan 8 tasi bronza medallaridir. Demak, Toshkentda o‘tkazilgan dunyo birinchiligi ushbu yo‘nalishda qo‘lga kiritilgan dastlabki oltin medal bilan yodimizda qolmoqda.
Bellashuvlar yakunlanganidan keyin turli yo‘nalishlarda taqdirlangan laureatlar ro‘yxati quyidagicha:
Eng yaxshi sportchi:
Yigitlar: Zafarbek Karimov (O‘zbekiston)
Qizlar: Sanaz Fazlabad (Eron)
Eng yaxshi jamoa:
Yigitlar: Rossiya
Qizlar: Eron
Eng yaxshi murabbiy:
Yigitlar jamoasi: Sergey Kostanenko (Rossiya)
Qizlar jamoasi: A’zam Dorusti (Eron)
Eng yaxshi hakam:
Erkaklar: Denis Kim (Rossiya)
Ayollar: Kseniya Levay (Serbiya)
Shuningdek, “Faol ishtiroki uchun” Avstraliya, “Jangovor ruh” yo‘nalishida Marokash terma jamoalari taqdirlanishdi.