Qozog‘iston poytaxtida o‘tayotgan sport kurashlari bo‘yicha jahon chempionatining ikkinchi kuni terma jamoamiz uchun omadli o‘tmoqda.

Biroz avval yunon-rim kurashi bo‘yicha -87 kilogramm vazn toifasida bahs olib borayotgan vakilimiz Rustam Assakalov yarim final yo‘llanmasini qo‘lga kiritdi. Musobaqa reglamentiga ko‘ra, yarim final ishtirokchilari kelasi yili Tokio Olimpiadasida ishtirok etish huquqini qo‘lga kiritadilar. Vakilimiz jahon chempionatini panamalik kurashchi ustidan qozonilgan g‘alaba bilan ishtirok bahslarni boshladi va shundan so‘ng Turkiya, Rossiya va chorak finalda Kuba terma jamoasi vakillarini ham mag‘lubiyatga uchratdi.

Hamyurtimiz endilikda final yo‘llanmasi uchun vengriyalik Viktor Lorinsga qarshi gilamga chiqadi.

Eslatib o‘tamiz, bu O‘zbekiston delegasiyasi uchun Tokio Olimpiadasiga qo‘lga kiritilgan beshinchi yo‘llanma bo‘ldi. Ma’lumot uchun, Rustam Assakalov 2015 yili Las-Vegas mezbonlik qilgan dunyo birinchiligida kumush medalni qo‘lga kiritib Rio Olimpiadasiga yo‘llanma olgan edi.