Bugun poytaxtimizdagi muhtasham “Humo arena” muz saroyida dzyudo bo‘yicha navbatdagi Gran-pri musobaqasi start oladi. Tokio Olimpiadasiga qimmatli reyting ochkolarini taqdim qiladigan mazkur musobaqa 3 kun davom etib, unda sayyoramizning 70 dan ziyod mamlakatidan tashrif buyurgan 500 ga yaqin mohir dzyudochilar g‘alaba yo‘lida kurash olib borishadi.
Bugun yengil vazn toifalarida bahslar o‘tkaziladi. Unda erkaklar -60 kg, -66kg, ayollar -48 kg, -52 kg va -57 kg vazn toifalarida raqobatlashadilar. Reglamentga ko‘ra, bunday musobaqada mezbon davlat har bir vazn toifasida 4 nafardan ishtirokchisini ro‘yxatdan o‘tkazishi mumkin. Bugun jamoamizning 19 nafar vakili tatamiga chiqadi.
