Бугун пойтахтимиздаги муҳташам “Ҳумо арена” муз саройида дзюдо бўйича навбатдаги Гран-при мусобақаси старт олади. Токио Олимпиадасига қимматли рейтинг очколарини тақдим қиладиган мазкур мусобақа 3 кун давом этиб, унда сайёрамизнинг 70 дан зиёд мамлакатидан ташриф буюрган 500 га яқин моҳир дзюдочилар ғалаба йўлида кураш олиб боришади.
Бугун енгил вазн тоифаларида баҳслар ўтказилади. Унда эркаклар -60 кг, -66кг, аёллар -48 кг, -52 кг ва -57 кг вазн тоифаларида рақобатлашадилар. Регламентга кўра, бундай мусобақада мезбон давлат ҳар бир вазн тоифасида 4 нафардан иштирокчисини рўйхатдан ўтказиши мумкин. Бугун жамоамизнинг 19 нафар вакили татамига чиқади.