Eronda davom etayotgan futzal bo‘yicha Osiyo chempionati-2020 saralash bahslari doirasida O‘zbekiston milliy terma jamoasi Nepal bilan to‘qnash keldi va 4:1 hisobida g‘alaba qozondi. Natijada futzalchilarimiz qit’a chempionati final bosqichi yo‘llanmasini naqd qilishdi.

O‘yindan keyin o‘tkazilgan matbuot anjumanida terma jamoamiz bosh murabbiyi Bahodir Ahmedov quyidagicha fikr bildirib o‘tdi:

"Nepal terma jamoasi bugun ancha yaxshi o‘yin namoyish etdi. Nepalliklar bizga yetarlicha qarshilik ko‘rsatishga urindi. Yakunda qayd etilgan natijadan xursandman. Ammo butun o‘yin davomida shogirdlarim harakatlaridan to‘la mamnun bo‘ldim, deya olmayman. Zero juda ko‘plab vaziyatlarda kichik xatolarga yo‘l qo‘ydik, ko‘plab qulay imkoniyatlardan unumli foydalana olmadik. Biroq asosiysi – mazkur uchrashuvda ham g‘alaba qozona oldik va natijada Osiyo chempionati final bosqichiga yo‘l oldik.  

Bugun bir qator yosh futzalchilarimizga o‘yin imkoniyatini taqdim etdim. Ular mana shunday uchrashuvlarda o‘ynab, sekin-asta tajriba to‘plashi lozim.  

Endi oldinda yana bir muhim o‘yin turibdi. Biz har bir uchrashuvda faqat g‘alaba qozonishga urinamiz. Tojikiston bilan bo‘ladigan uchrashuvda ham faqat g‘alaba uchun harakat qilamiz", — dedi tajribali mutaxassis.