Rossiyaning "Rostov" klubi qishki tanaffusga g‘alaba bilan chiqib ketadigan bo‘ldi. Karpin shogirdlari 19-turni Moskvada "Spartak"ga qarshi o‘tkazib, yirik hisobda g‘alaba qozonishdi. Vatandoshimiz Eldor Shomurodov ushbu g‘alabaga katta hissa qo‘shdi.

Bahsning 22-daqiqasida Bayramyan tomonidan yetkazilgan uzatmaga o‘zbekistonlik futbolchi bosh bilan zarba berdi. To‘p esa ustunga tegib qaytdi va o‘sha joyda turgan Zaynutdinov darvozani ishg‘ol qildi.

Birinchi bo‘lim so‘ngida yon chiziqdan otib berilgan to‘pni Shomurodov bosh bilan raqib jarima maydoniga o‘tkazdi. To‘p esa "Spartak" himoyachisining qo‘liga tegdi va penalti belgilandi. 11 metrli jarima zarbasini esa Ivelin Popov "panenka" uslubida tepdi, ammo mezbonlar posboni osongina to‘pni egallab oldi.

Ikkkinchi bo‘lim boshida Eldorning uzatmasidan keyin Ionov 1 metrdan bo‘sh qolgan darvozani ishg‘ol qildi — 0:2.

Bahsning 74-daqiqasida Shomurodov zaxiraga olindi va uning o‘rniga Sigurdarson maydonga tushirildi. Shundan keyin "Spartak" bitta javob to‘pini kiritgan bo‘lsa, "Rostov" yana ikki marta raqib darvozasiga yo‘l topdi — 1:4.

Ushbu g‘alaba tufayli "Rostov" o‘z ochkolarini 34taga yetkazgan holda jadvalda 3-o‘ringa ko‘tarilgancha qishki ta’tilga yo‘l oldi. Shomurodov esa dastlabki 19ta turda 10ta gol urdi va 4ta golga assistentlik qildi.

Rossiya premyer-ligasi, 19-tur
Spartak – Rostov 1:4 (0:1, 1:3)
Gollar: 0:1 – 22 Zaynutdinov, 0:2 – 53 Ionov, 0:3 – 79 Chistyakov, 1:3 – 81 Ponse, 1:4 – 83 Zaynutdinov.
Spartak – Maksimenko, Umyarov, Zobnin, Jikiya, Til (Shyurrle, 72), Melgarexo, Bakayev, Kral, Mirzov (Bakayev, 80), Ponse, Larsson.
Rostov – Pesyakov, Kozlov, Chernov, Xajikadunich, Chistyakov, Popov, Zaynutdinov (Saplinov, 87), Bayramyan, Normann, Ionov (Dolgov, 90), Shomurodov (Sigurdarson, 74).
Ogohlantirishlar: Popov (18), Jikiya (38), Kral (42), Umyarov (77), Saplinov (90).