Yilning eng yahshi yosh futbolchisi deb e’tirof etilgan Jasur Jaloliddinov bilan kichik suhbat uyushtirdik.
Bugungi sovrin siz uchun birinchisi edi. Qanday tuyg‘ularni his etdingiz?
Ochig‘i o‘tgan yili ham nomzodim qo‘yilgan bo‘lsada, g‘oliblik menga nasib etmagan edi. Boya Mirzahakim aka juda to‘g‘ri gapirdilar. O‘tgan yili aynan shu kunda bu sovrinni qo‘lga kiritishni oldimga maqsad qilib qo‘ygan edim. Yaratganga shukurlar bo‘lsin, o‘z niyatimga erishdim. Ilk sovrin bo‘lgani bois, hayajon bosdi. Biroz g‘alati tuyg‘ular. Buni so‘z bilan tushuntirish juda mushkul.
«Benavento» klubi safiga o‘tishingiz borasida nimalar deya olasiz?
Bilasizmi, menga bu borada so‘zlashni ma’n etishgan. Ayni damda klub ixtiyorida bir necha kun mashg‘ulotlarda ishtirok etdim. Inzagi qo‘l ostida o‘tgan mashg‘ulotlardan so‘ng, Toshkentga qaytdim. Xali 18 yoshga to‘lmaganim bois, shartnoma tuzishning iloji bo‘lmadi. Tez orada transferim borasidagi yangiliklardan muxlislarimiz xabar topishadi.
