Avjiga chiqayotgan "sovg‘ali kunlar"da yana bir katta to‘qnashuv. Derbi. London derbisi, bundaylari ko‘p bilasiz, lekin titullar va muxlislar soni bo‘yicha bu eng kattasi.
Ayniqsa, Venger va Mourinyu bir-birining “yoqasidan” olgan davrlar u boshqacha o‘tardi. Frenk Lempard va Mikel Arteta ham qatnashgan ularda. Bilishadi. Futbolchi sifatida. Hammasi uchun javobgar shaxs sifatida esa bugun birinchi bor yuzma-yuz chiqishadi. Ikkala klub yangilikka qo‘l urdi. Murabbiylik tajribasi bo‘lmagan ikki sobiq futbolchi rulga o‘tirdi.
Lempardning ustunligi - u xaqiqiy afsona! "Chelsi" tarixidagi eng zo‘rlardan biri. Uni rahbariyat va muxlislar birdek hurmat qiladi.
Arteta o‘rtacharoq darajada bo‘lgan. Mehnatkash. Ammo uning ham ustun jihati bor. U ustoz ko‘rdi. Eng TOP-murabbiylardan biri yonida o‘tirdi va sezganmisiz yo‘qmi Gvardiola ko‘p vaziyatda borib Artetaning gapini olardi. Plyus Pep qizishganda faqatgina Mikel borib uni tinchlantirardi. Men uchun derbi aynan yosh kouchlar jangi.
"Arsenal" - "Chelsi", 18:45dan FUTBOL-TVda birga tomosha qilamiz.
Davron FAYZIYEV.