Xabaringiz bor, ertaga “Paxtakor” o‘z maydonida OCHL 2-turidan o‘rin olgan bahsda Eronning “Shahr Xodro” klubini qabul qiladi. Bugun o‘yin oldidan matbuot anjumani bo‘lib o‘tdi. Bugun uchrashuv oldidan “sherlar” ustozi Shota Arveladze hamda himoyachi Yegor Krimes ishtirok etdi.
Arveladze: - O‘ylashimcha, biz uchun o‘yin oson kechmaydi. Eron jamoalari jismonan baquvvat, himoyada tartibli futbol ko‘rsatishadi. Chempionlar ligasida oddiy jamoalar bo‘lmaydi. Raqib uchun ham o‘yinning ahamiyati juda yuqori. Dastlabki ikki uchrashuvni uyda o‘ynayapmiz, oxirgi turlarda esa safarda o‘ynaymiz. Shu sababli g‘alaba qozonish muhim. Muxlislar bizni yana faol qo‘llab turishlariga umid qilaman.
Krimes: - Ertaga yaxshi o‘yin bo‘ladi deb o‘ylayman. Eron klublari juda jiddiy qarshilik qilishadi. Ular jismoniy faollikka asoslangan o‘yin namoyish etishadi. Muxlislarni stadionga chorlab qolaman.
– Eren Derdiyo‘q qachon to‘liq tayyor bo‘ladi?
– Derdiyo‘qning jamoa uslubiga to‘liq ko‘nikib ketishi uchun vaqt kerak. Jismonan tayyor bo‘lgan holatda ham o‘yin va yigitlarga moslashib ketishi zarur.
– “Paxtakor” Eron jamoalariga qarshi yaxshi o‘ynaydi. Statistikaga qaraydigan bo‘lsangiz, “sherlar” deyarli o‘z maydonida Eron klublariga yutqazmagan. Ertaga bu jamoaning ruhiyatiga tasir o‘tkazmaydimi?
Arveladze: - Eron klublari bilan statistika foydamizga ishlashi bizga xalal qilmaydi. Bu umuman boshqa o‘yin. Biz ertaga yangi raqibga qarshi yangi bellashuvni o‘tkazamiz. Shu sababli bu hech kimni bo‘shashtirmaydi. Biz yaxshi o‘yin namoyish etish uchun chiqamiz.
Krimes: - Bu jamoaning Chempionlar ligasidagi ikki o‘yinini ko‘rdik. Ularning o‘sha o‘yinlarda gol urmagani hujum chizig‘i bo‘yicha nimanidir bildirmaydi. Raqibning kuchli va kuchsiz tarafini o‘rganib chiqib, shunga yarasha o‘yin namoyish qilamiz.
