Koronavirusga chalingan «Elche» hujumchisi Jonatas kasallik belgilari va o‘zining ahvoli haqida gapirib o‘tdi.

«Tana haroratim ko‘tarilib, o‘zimni yomon his qildim. Dastlab shunchaki bosh og‘rig‘i deb o‘yladim. Boshim va butun badanim zirqirab og‘ridi. Erta tongda esa vrach bilan gaplashganimda, u menga zudlik bilan test topshirishim kerakligini, bu koronavirus belgilari ekanini aytdi. Test esa ijobiy natija berdi.

Mashg‘ulot o‘tkaza olmadim, holsizlikni his qildim. Ayniqsa, dastlabki 3 kun qiyin bo‘ldi. Tanamda kuch yo‘q edi. Dushga kirganimda esa xushimdan ketib qolishimga oz qoldi. Og‘riq kuchli bo‘ldi. Men bunaqasini ilgari his qilmaganman. Bu virus – hazillashadigan narsa emas.

Hozir ancha yaxshiman. Mashg‘ulotlarni boshladim. Sportchi bo‘lishimga qaramay juda qiynaldim. Qari insonlarga qanchalik qiyinligini tasavvur qilyapsizmi? Bu virus qanchalik xavfli ekanini ba’zi insonlar hamon anglab yetmayapti», – dedi Jonatas "Globo Esporte"ga bergan intervyusida.