Коронавирусга чалинган «Эльче» ҳужумчиси Жонатас касаллик белгилари ва ўзининг аҳволи ҳақида гапириб ўтди.

«Тана ҳароратим кўтарилиб, ўзимни ёмон ҳис қилдим. Дастлаб шунчаки бош оғриғи деб ўйладим. Бошим ва бутун баданим зирқираб оғриди. Эрта тонгда эса врач билан гаплашганимда, у менга зудлик билан тест топширишим кераклигини, бу коронавирус белгилари эканини айтди. Тест эса ижобий натижа берди.

Машғулот ўтказа олмадим, ҳолсизликни ҳис қилдим. Айниқса, дастлабки 3 кун қийин бўлди. Танамда куч йўқ эди. Душга кирганимда эса хушимдан кетиб қолишимга оз қолди. Оғриқ кучли бўлди. Мен бунақасини илгари ҳис қилмаганман. Бу вирус – ҳазиллашадиган нарса эмас.

Ҳозир анча яхшиман. Машғулотларни бошладим. Спортчи бўлишимга қарамай жуда қийналдим. Қари инсонларга қанчалик қийинлигини тасаввур қиляпсизми? Бу вирус қанчалик хавфли эканини баъзи инсонлар ҳамон англаб етмаяпти», – деди Жонатас "Globo Esporte"га берган интервьюсида.