Xalqimiz boshiga jiddiy sinovlar tushayotgan shu kunlarda O‘zbekiston aholisi bir yoqadan bosh chiqargan holda bu musibatlarga qarshi birlashmoqda.
Bir necha kun oldin Sirdaryo viloyatidagi Sardoba suv omborida yuz bergan falokat ham jafokash xalqimizni bir maqsad yo‘lida birlashtirdi. Bu fojea O‘zbekiston Respublikasi Jismoniy tarbiya va sport vazirligi va tizimdagi barcha tashkilotlar rahbar va xodimlarini befarq qoldirgani yo‘q.
Shu munosabat bilan, 2 may kuni Jismoniy tarbiya va sport vazirligi tizimidagi ishchi-xodimlar, sportchilar va trenerlar Sardoba fojeasida jabr ko‘rgan oilalarga yordam aksiyasini boshlashdi.
Ular tomonidan to‘plangan buyumlar, oziq-ovqat mahsulotlari, issiq kiyim-kechaklar, gigiyenik vositalar, kir yuvish mashinalari, sport kiyimlari va jihozlaridan iborat “Sahovat karvoni” kechaning o‘zida Sirdaryo viloyatiga yetkazib berildi.
Jismoniy tarbiya va sport vazirligi tomonidan yuborilgan homiylik ko‘magi Guliston olimpiya zaxiralari maktab-internati hamda Sirdaryo viloyati bolalar-o‘smirlar futbol akademiyasi (Futbol mahorati maktabi) yotoqxonalariga vaqtinchalik evakuasiya qilingan yurtdoshlarimizga yetkazib berildi.
Shuningdek, bu yerga joylashtirilgan fojeadan jabr chekkan yurtdoshlarimizning bo‘sh vaqtlarini mazmunli tashkil etish hamda ularni ruhiy qo‘llab-quvvatlash maqsadida stol tennisi, shaxmat-shashka sport turlari bo‘yicha bir qator musobaqalar ham tashkil etilmoqda.
Bugun, 3 may kuni ham Jismoniy tarbiya va sport vazirligining "Sahovat" aksiyasi doirasida Toshkent shahrida yig‘ilgan ro‘zg‘or buyumlari, issiq kiyim-kechaklar, oziq-ovqat mahsulotlari, maktab o‘quvchilari uchun badiiy kitoblar ham o‘quv qurollari va boshqa turdagi mahsulotlardan tashkil topgan ikkinchi “Sahovat karvoni” Sirdaryo viloyatiga jo‘natildi.
Jismoniy tarbiya va sport vazirligi
Matbuot xizmati
