Superliganing 4-turidan o‘rin olgan "Nasaf" hamda "Navbahor" (2:2) jamoalari o‘rtasidagi o‘yin so‘ng "lochinlar"ning birinchi goliga mualliflik qilgan Mirzohid G‘ofurov quyidagi fikrlarni bildirib o‘tdi.

"Superliganing qaytgani bilan barchani tabriklayman. Birinchi o‘yinni yomon o‘tkazmadik. Albatta, rejamizda tezkor gol urib olish bor edi. Sababi uzoq tanaffusdan keyin hamma futbolni sog‘ingandi. Agressiv futbol bo‘lishi aniq edi.

"Nasaf" yaxshi shakllangan jamoa. Ular safida bir nechta yosh va ajoyib futbolchilar bor. Menimcha, ular yaqqol ustunlik qilishmadi. Biz goldan so‘ng qarshi hujum taktikasida o‘ynaganimiz uchun ko‘pchilikka shunday tuyuldi.

"Navbahor"ning maqsadi chempion bo‘lish. Keyingi mavsumda OCHLda o‘ynashni xohlaymiz. "Navbahor" o‘z oldiga yuqori maqsadlarni qo‘yadigan jamoa.

Azizning penaltidan foydalana olmagani juda alamli, lekin bu futbol. Uning xatosini jamoadagilar to‘g‘ri qabul qildi. Azizning o‘zi ham tushkun holatda, bunday vaziyatda faqat uni qo‘llab ruxiy dalda berish kerak. Uni ayblash notog‘ri, ertaga uning o‘rnida boshqa futbolchi bo‘lishi ham mumkin. Shu sababli, bundan to‘g‘ri xulosa chiqarishimiz kerak", -deydi G‘ofurov saytimiz uchun bergan intervyusida.