Superliganing 5-turidan o‘rin olgan "Qo‘qon-1912" hamda "Qizilqum" jamoalari o‘rtasidagi o‘yindan so‘ng mezbonlar futbolchisi Quvondiq Ro‘ziyev o‘z fikrlarini bildirib o‘tdi.

"Karantindan keyingi futbol ko‘pchilik uchun qiziq kechmoqda. Kutilmagan natijalari bilan hammani ajablantirmoqda. "Paxtakor"ning mag‘lubiyati, Qarshidagi ajoyib o‘yin, Toshkentdagi kutilmagan uchrashuv. Menimcha, 4- va 5-tur jamoalarni o‘ziga kelib olishi uchun yetarli bo‘ladi. Undan keyin klublarning o‘yiniga baho bersak bo‘ladi.

To‘g‘ri, kecha ikki xil bo‘limlar guvohiga aylandik. Birinchi bo‘limda o‘yinimiz qovushmadi va vaziyatlardan unumli foydalana olmadik. Tanaffusda Baxtiyor aka agar yuqori o‘rinlar uchun kurashishni xohlasak, bunday o‘yinlarda g‘alaba qozonishimiz kerakligini aytdi. Murabbiyning gaplari bizga qattiq ta’sir qildi. Ikkinchi bo‘limda biz o‘z omadimizni oldinda sinab ko‘rdik va ko‘zlagan natijaga erishdik.

Murabbiy shuni ham ta’kidalab o‘tgandiki, 1ta gol hammasini o‘zgartirib yuboradi degandi. Ko‘rdingiz, 1ta goldan keyin raqib himoyasida parokandalik yuzaga keldi.

Bu yil jamoamiz har yilgidan ko‘ra kuchliroq tarkibga ega. Ashurmatov kuchli futbolchilardan iborat yaxshi jamoa tuza oldi. Maqsadimiz kuchli 5likdan o‘rin olish. "Qo‘qon-1912" endi Superligada qolish uchun kurashmaydi", -deydi futbolchi saytimiz uchun bergan intervyusida.