“Arsenal” “Vulvz”ni mahv etib, endi “Lester”ni qabul qiladi. YECHL yo‘llanmasidan umidini uzgan, biroq YEL ishtirokchisi bo‘lish uchun kurashadi hali. Har holda oxirgi natijalar asos bera oladi.

Arteta yigitlari restertdan so‘ng yaxshi qaytishmadi: “ManSiti”ga boy berilgan o‘yin (0:3) va “Brayton”dan yengilgach (1:2), “Sautgempton”ni (2:0), “Norvich”ni (4:0) va “Vulvz”ni (2:0) mag‘lubiyatga uchratdi.

“Arsenal”ga muammo bo‘ladigan narsa faqatgina “Lester”ning maqsadlari. Rodjers shogirdlarining orzulari ulkanroq, albatta. Klub karantindan so‘ng muxlislarini ranjitmoqda - “Uotford” va “Brayton” bilan durang, kubokda “Chelsi”dan qaqshatqich zarba va “Everton”dan fiasko (1:2) “tulkilar”ning uchinchi o‘rnini ancha qimirlatib qo‘ydi.

Ko‘ryapsizmi, jamoalarning holati bugungi jang jiddiy bo‘lishini taqozo etadi.

Yana bu o‘yin agar bu bahsda jamoalar o‘zlariga kerakli natijani qayd etishmasa, keyingi o‘yinlarida jiddiy sinovlarga duch kelishi bilan-da muhim.

“Arsenal”ni “Tottenxem” safari, so‘ng “Liverpul” bilan o‘yin, oxirida “ManSiti” bilan kubok yarimfinalidagi uchrashuv kutib turibdi. Hozir hal qilib olmasa, keyingi o‘yinlariga ta’sir qilishi turgan gap.

“Lester” oxirgi turlarda “Tottenxem” va “MYU” bilan saflanishini hisobga olsak, uning uchun ham muhim pallalar yetib keldi.

Menimcha, “Emereyts”dagi bugungi o‘yin yil bahsiga aylanib ketishi mumkin.

“Bo‘rilar”ga yem bo‘lmay omonlik topgan “to‘pchilar” “tulkilar” ayyorligi oldida qanday usul qo‘llasharkan, ko‘ramiz.

Futbol TV kanali orqali 00:15da “APL jangi”ga yo‘l olamiz. Birgalikda...

Xayrulla HAMIDOV.