Ispaniya chempionatining 35-turi doirasida "Barselona" klubi o‘z uyida "Espanyol"ni qabul qilib, oson bo‘lmagan g‘alabani qo‘lga kiritdi.

Setyen shogirdlari, 3 kun avval "Vilyarreal"ga qarshi bo‘lib o‘tgan uchrashuvdan farqli ravishda, bu safar u qadar yorqin o‘yin namoyish eta olishmadi. Shu bois, birinchi bo‘limda "ko‘k-anorranglilar"ning pozision hujumlaridan ko‘ra "Espanyol"ning qarshi hujumlari ancha xavfli bo‘ldi. Ayniqsa, taym so‘ngida Didakning zarbasidan keyin to‘p ustunga tegdi.

Ikkinchi bo‘lim esa kutilmagan voqealar bilan boshlandi. Taym boshida Ansu Fati maydonga tushdiyu, oradan 4 daqiqa o‘tib ehtiyotsiz harakat oqibatida maydonni tark etdi. Hakam videotakror yordamida 17 yoshli futbolchiga qizil kartochka ko‘rsatdi.

Oradan 3 daqiqa o‘tib esa mehmonlar yarim himoyachisi Pol Losanoga hakam dastlab sariq kartochka ko‘rsatdi. Vaziyatni takroran ko‘rgach esa "sariq"ni "qizil"ga aylantirdi.

56-daqiqaga kelib hisob ochildi. Mezbonlar raqib jarima maydoni ichida chiroyli hujum tashkil qilishdi. Grizmann to‘pni tovoni bilan Messiga qoldirdi, Leoning zarbasini darvozabon qaytardi. Qaytgan to‘pni esa Suares darvozaga joylab qo‘ydi.

Bitta to‘p farqi qaltis hisob ekanini bilgan holda "Barselona" kam sonli bo‘lsa-da hujumlar uyushtirib turdi. Leo Messi tomonidan yo‘llangan kuchli zarbani Diyego Lopes qiyinchilik bilan qaytardi.

Bahs so‘ngida esa "Espanyol" mezbon jamoa muxlislarini xavotirda ushlab turdi, ammo mag‘lubiyatdan qutulib keta olmadi.

Ushbu g‘alabadan keyin "Barselona" o‘z ochkolarini 76taga yetkazib oldi. 77 ochko jamg‘argan "Real" o‘z o‘yinini 10 iyul kuni "Alaves"ga qarshi o‘tkazadi.

"Espanyol" esa La ligani tark etib, Segundaga yo‘l oldi.

Ispaniya La ligasi, 35-tur
Barselona – Espanyol 1:0 (0:0, 1:0)
Gol: 1:0 – 56 Suares.
Barselona – ter Shtegen, Alba, Langle, Semedu (Fati, 46), Serdji Roberto, Buskets, Rakitich (Arauxo, 90), Pike, Suares (Breytueyt, 82), Grizmann (Vidal, 71), Messi.
Espanyol – Diyego Lopes, Didak Vila, Viktor Gomes, Kalero (Darder, 66), David Lopes, Embarba (Kampusano, 74), Losano, Kabrera, Roka (U Ley, 86), Espinosa, de Tomas.
Ogohlantirishlar: de Tomas (45), David Lopes (90).
Chetlatishlar: Fati (50), Losano (53).