Superliganing 9-turida "Paxtakor" Toshkentda AGMK jamoasini qabul qiladi.

Olmaliq shahri jamoasiga qarshi "Paxtakor" chempionatlar tarixida 24 uchrashuvda maydonga tushgan. 18 bellashuv "Sherlar" g‘alabasi bilan yakunlangan. 2 o‘yin durang bilan tugagan va 4 bor raqib muvaffaqiyatga erishgan. 5 marta "Sherlar" ushbu jamoani yirik hisobda dog‘da qoldirishgan.

Toshkentda AGMK bir marta, 2013 yil 2:1 hisobida zafar quchgan. O‘z maydonida jamoamiz 9 g‘alaba, 2 durang va 1 mag‘lubiyatni qayd etgan.

"Paxtakor" olmaliqliklar darvozasini 40 bor ishg‘ol qilgan. Raqib esa 14 gol urishga erishgan. O‘zaro o‘yinlarda jamoamiz to‘purari Igor Sergeev hisoblanadi. U 6 bor ushbu jamoa darvozasiga gol urgan. Odil Ahmedov va Sherzod Karimov hisobida 5tadan gol bor. Vladimir Kozak va raqibdan Zafar Polvonov 3tadan to‘pga ega. Aleksandr Geynrix, Marko Simich hamda Dragan Cheran 2 martadan raqib darvozasini ishg‘ol qilishgan.

O‘tgan yili jamoalar chempionat o‘yinlaridan tashqari ikki kubok musobaqa finalida to‘qnash kelishgan. Barcha to‘rt uchrashuvda "Paxtakor" AGMKdan yirik hisobda ustun kelgan. Chempionatda 4:1 va 3:0, kuboklar finallarida 3:0 va 6:2 hisobida raqibni tor-mor keltirgan.

Jamoalar safida diskvalifikasiyaga uchragan futbolchilar yo‘q.

"Paxtakor" va AGMK o‘rtasidagi uchrashuv 13 iyul, dushanba kuni 20:00da "Paxtakor" stadionida boshlanadi.