Xalqaro futbol assosiasiyalari kengashi (IFAB) bir o‘yin davomida besh o‘yinchini almashtirish qoidasining amal qilish muddatini uzaytirdi.

Ushbu qoida klublar ishtirokida turnirlar uchun 2021 yilning 31 iyuligacha, terma jamoalari o‘rtasidagi xalqaro musobaqalar uchun esa 2021 yilning avgustiga qadar uzaytirildi. Shu bilan birga, ushbu qoidani qabul qilish har bir liga ixtiyoriga havola qilindi.

Eslatib o‘tamiz, 5ta o‘yinchi almashtirish qoidasi koronavirus pandemiyasi tufayli yuzaga kelgan uzoq muddatli tanaffusdan qayta davom ettirilgan musobaqalar paytida o‘yinchilarga tushadigan yuklama va jarohatlarni kamaytirish maqsadida qabul qilingan edi.  

2019/20 va 2020/21 mavsumlar oralig‘idagi ta’til qisqa muddatli bo‘lishi tufayli futbolchilar yetarlicha dam olish imkoniyatiga ega bo‘lmayotgani uchun qoidani keyingi mavsum oxirigacha uzaytirishga qaror qilindi.