«Liverpul» yarim himoyachisi Adam Lallana klubdagi 6 yillik faoliyati yakuni munosabati bilan muxlislarga xayrlashuv maktubini yozdi.

«So‘nggi olti yil ichida muhabbat va minnatdorlikdan boshqa narsa bo‘lmadi. O‘zimni uyimdagidek his qilishimda yordam bergan ajoyib insonlarga, meni qabul qilgan muxlislarga rahmat. Jahon darajasidagi xodimlarga ham rahmat, ularsiz bu yutuqlarning hech biriga erishmagan bo‘lardik. Ularning men uchun qanchalik qadrli ekanini tasvirlab berish uchun so‘z topa olmayapman. Ushbu ajoyib klub sharafini himoya qilish imkoniyatini taqdim etgan Brendan Rojersdan minnatdorman. Yurgen Klopp esa shunchaki futbol murabbiyi emas, balki undan-da ko‘proqdir.

Jamoadoshlarimga ham rahmat, ularning hammasi aka-ukalarim. Men o‘zimni o‘yindagi eng baxtli yigit kabi his qildim. Jordan Henderson — mening eng yaqin do‘stim! Hech kim bu yigitdan ko‘proq muvaffaqiyatga loyiq emas. Bu degani, hamma narsa uning tomonida bo‘lishi kerak. Oilam, rafiqam, bolalarim, ota-onam va singlim — mening jamoamdir. Ular har doim yonimda bo‘ldi, yaxshi kunlarimda ham, yomon kunlarimda ham.

Ushbu o‘ziga xos jamoaning bir qismi bo‘lganimdan juda minnatdorman. Endi esa navbat yangi sarguzashtlarga», — deb yozadi Lallana Instagram’dagi sahifasida.