"Napoli" rahbariyati bosh murabbiy Jennaro Gattuzo bilan yangi shartnoma borasida kelishuvga erisha olmayapti.

"Gazzetta dello Sport" tarqatgan xabarga ko‘ra, klub xo‘jayini Aurelio de Laurentis yangi shartnomada murabbiy to‘lashi mumkin bo‘lgan 7 million yevro miqdoridagi jarima haqida band bo‘lishini istamoqda. Mutaxassis boshqa klubga o‘tib ketishni istasa, shunday miqdordagi jarima to‘lashiga to‘g‘ri keladi.

42 yoshli Gattuzoning "Napoli" bilan amaldagi shartnomasi 2021 yilning yozida yakuniga yetadi. Joriy mavsumda neapolliklar Italiya chempionatida 7-o‘rinni egallashgan bo‘lsa, Italiya kubogini qo‘lga kiritishdi. Jamoa Yevropa chempionlar ligasida nimchorak finaldan chiqib ketdi.