Butun dunyoda hukm surayotgan SOVID-19 pandemiyasi futbol sport turiga ham o‘z ta’sirini o‘tkazmoqda. Shu sababdan OFK qit’a miqyosidagi musobaqalarni yuqori saviyada o‘tkazish va jamoalarning katta musobaqalarga yetarlicha tayyorgarlik ko‘rishini ta’minlash maqsadida mavjud vaziyatni o‘rganib chiqayotgan edi.

Bugun Osiyo Futbol Konfederasiyasi Kuala Lumpurdagi bosh qarorgohda rasmiy yig‘ilish o‘tkazdi. Unda U19 va U16 Osiyo chempionatlarining 2021 yil boshida o‘tkazilishi ma’lum qilindi.

Futzal bo‘yicha BAA mezbonligida o‘tishi rejalashtirilgan klublar o‘rtasidagi Osiyo chempionati bekor qilindi.

Shuningdek, Quvaytda bo‘lib o‘tishi rejalashtirilgan Futzal bo‘yicha Osiyo chempionati joriy yilning 2-13 dekabr kunlari bo‘lib o‘tishi xabar qilindi.

Bundan tashqari, yig‘ilishda Osiyo Chempionlar Ligasi yangi taqvimi masalasida ham so‘z bordi. Unga ko‘ra, sharqiy mintaqada uchrashuvlar 15 noyabrdan 13 dekabrgacha bo‘lib o‘tadi. Final uchrashuvi esa bitta uchrashuvdan iborat bo‘lgan holda g‘arbiy mintaqada 19 dekabr kuni bo‘lib o‘tadi.

Osiyo Futbol Konfederasiyasining kelgusi musobaqalar uchun e’lon qilgan taqvimi:

Osiyo chempionlar ligasi / Sharq Mintaqasi
15 noyabr - 13 dekabr

U19 Osiyo Chempionati
2021 yil avvalida

U16 Osiyo chempionati
2021 yil avvalida

Futzal bo‘yicha Osiyo chempionati
2-13 dekabr

Klublar o‘rtasidagi futzal bo‘yicha Osiyo chempionati
bekor qilindi