Xabaringiz bor, O‘zbekiston milliy terma jamoasi BAA bilan o‘rtoqlik o‘yini o‘tkazish uchun kecha tunda Dubay shahriga yetib bordi.

MTJ delegasiyaning har bir a’zosi Dubay xalqaro aeroportida koronavirusga test topshirdi va test natijalari chiqquniga qadar ular mehmonxonada "o‘zini yakkalash" rejimida bo‘lib turdi.

Tahlil natijalariga ko‘ra hech kimda koronavirus infeksiyasi aniqlanmadi va jamoa mashg‘ulotlariga ruxsat berildi. Milliy jamoamiz bugungi mashg‘ulotlarni BAA futbol assotsiatsiyasi maydonida o‘tkazdi.

Dubaydagi yig‘in davomida koronavirus infeksiyasidan saqlanish, delegasiya a’zolari sog‘ligini xavf ostida qoldirmaslik va BAAga qarshi o‘yinga to‘sqinlik qiladigan xatarlarni oldini olish maqsadida Milliy terma jamoamiz faqatgina "mehmonxona - stadion" yo‘nalishi bo‘ylab harakat qilishi belgilab qo‘yildi.

Shu sababli, delegasiyaning barcha a’zosi karantin qoidalari va normalariga qat’iy amal qilgan holda, mehmonxona va stadion hududidan chetga chiqqani yo‘q.

Futbolchilarning sog‘ligi va kayfiyati a’lo darajada, ayniqsa terma jamoaning yosh a’zolari o‘ziga hos ishtiyoq bilan mashg‘ulotlarda ishtirok etmoqda.

O‘zbekiston MTJ ertaga "Shabab Al Ahli" klubiga tegishli "Al Rashid" stadionida o‘yin oldi rasmiy mashg‘ulotini o‘tkazadi.