Moskvaning «Lokomotiv» klubi YECHL doirasida Madridning «Atletiko» klubiga qarshi bo‘lib o‘tadigan o‘yinga jiddiy tayyorgarlik ko‘rmoqda. "Loko" futbolchisi Gjegoj Krixovyak madridliklardan ochko tortib olishga ishonmoqda.

«Ertaga biz o‘tgan o‘yinga qaraganda samaraliroq o‘ynashimiz kerak. To‘g‘ri, "Bavariya"ga qarshi o‘yinda ham hurmat qozongandik, lekin ertaga yana-da yaxshiroq o‘ynashimiz kerak. Biz o‘zimizga, qobiliyatimizga ishonamiz.

Boshqa jamoalar singari «Atletiko»ni ham juda yaxshi bilaman. «Lokomotiv» bu klub bilan juda ko‘p uchrashgan va hech qachon oson bo‘lmagan. O‘ylaymanki, ertaga juda qiyin o‘yin bo‘ladi, lekin biz «Atletiko» bilan jang qilishga tayyormiz, barchasi o‘z qo‘limizda», – dedi yarim himoyachi.