Superliga 24-turdan o‘rin olgan "Mash’al" — "Navbahor" (3:0) uchrashuvidan so‘ng mehmonlar bosh murabbiyi No‘’mon Hasanov fikrlarini bildirib o‘tdi.

— Avvalo, "Mash’al" jamoasini haqli g‘alaba bilan tabriklayman. Birinchi goldan so‘ng ko‘p narsa o‘zgarib ketdi. Birinchi bo‘limda o‘yinimiz yomon chiqmadi. Futbolchilar yaxshi maydonda o‘ynashga o‘rganib qolishibdi. Paslar bilan kombinasion futbol ko‘rsatishimizga qaysidir ma’noda maydon sababchi bo‘ldi. Noqulay ob-havo sabab mashg‘ulotlarni zalda olib bordik. Mana shu omillar o‘yinimizni qovushmaganiga ta’sir ko‘rsata oldi.

— Birinchi davrada markazlashgan chempionatda o‘tgan uchrashuvda "Navbahor" 0:1 hisobida mag‘lub bo‘lgan edi, bugun esa yirik hisob qayd etildi. "Mash’al" "Navbahor" uchun noqulay raqibga aylanib ulgurdimi?
— Birinchi davradagi o‘yinda men yo‘q edim, tribunada o‘tirgandim. Ko‘rayotgan bo‘lsangiz bizda o‘yinimiz o‘zgardi. Uchta o‘yinda g‘alaba qozondik. Ko‘proq paslar bilan o‘ynay boshladik. Balki siz aytganingiz to‘g‘ridir. "Mash’al" biz uchun noqulay raqib. O‘yinimiz o‘xshamadi, sifatli maydonda boshqacha harakat qilishimiz mumkin edi.

— Uchta golda kimning xatosi ko‘proq bo‘ldi himoyachilarnimi yoki darvozabonni?
— Birinchi golda darvozabonning xatosi ko‘proq bo‘ldi. Chunki biz pas bilan birinchi zonadan ikkinchi zonaga o‘tamiz. To‘pni tepaverib o‘zimizga o‘zimiz gol olib keldik. Umuman hamma xato qildi. Yigitlarda shasht va shijoat ko‘rinmadi. Bu o‘yinga tayyorgarlikdan o‘zimni ham ko‘nglim to‘lmadi. Fitnes zalida mashg‘ulotlarni o‘tkazdik.

— Superligada qaysi klublarning maydonini "Mash’al"nikidan ham yomon deya olasiz?
— Avvallari ham bu yerda maydon holati yaxshi bo‘lgan. Sovuqdanmi yoki qor sababmi maydonda to‘p yurmadi. Hozirgi vaqtda "Navbahor" maydoni eng yaxshisi deya olaman. Qishki mavsumda chempionat o‘yinlari bo‘lmas edi. Mavsum vaqtliroq yakunlanardi.

— Andrey Kanchelskis davridagi qaysi g‘oyalarni yo‘qotish qiyin bo‘lmoqda?
— Andrey Kanchelskis boshqaruvida jamoa uzun to‘plar bilan o‘ynardi. Asosan yigitlarni ruhiyatini ko‘tarishga harakat qilyapmiz. Hamma murabbiy har xil, uslubi, falsafasi turlicha.