“Metallurg” – “Surxon” (1:0) uchrashuvidan keyin mehmonlar murabbiyi Vladimir Andreev jurnalistlarni qiziqtirgan savollariga javob qaytardi.

-  O‘yin jangovor tarzda kechdi. Har ikkala jamoaning o‘z maqsad va vazifalari bor edi. Biz Superligadagi mavqeimizni saqlab qolish uchun kurashayapmiz. “Metallurg” esa musobaqa jadvalida yuqoriroqqa ko‘tarilish harakatida. Muxlislar murosasiz o‘yinning guvohi bo‘lishdi. Ko‘plab vaziyatlar yuzaga keltirildi. Biz imkoniyatlarimizdan foydalana olmadik. “Metallurg” esa bitta vaziyatni golga aylantirdi. Bekobodliklarni g‘alaba bilan tabriklayman. Oldinda yana bitta tur bor. Bugun Superligada jon saqlab qolish uchun kurashayotgan jamoalarning barchasi mag‘lubiyatga uchradi. Barchasi o‘zimizning qo‘limizda. So‘nggi turda uyda raqibni taslim etsak, jamoani kuchlilar safida olib qolamiz.

-   Dilshod Jabborov nega maydonga tushirilmayapti?
-  Buning ob’ektiv va sub’ektiv sabablari bor. Pandemiyaga chalingan barcha o‘yinchilarga oson bo‘lmadi. Buning ustiga Dilshod yoshi katta o‘yinchilarimizdan. U ham kasallikka chalindi. Keyin jarohatlar unga xalaqit berdi. Vaziyatlar taqozosi bois uning xizmatlaridan foydalana olmadik, — deydi Vladimir Andreev.