2020 yilgi mavsumning so‘nggi uchrashuvini Bekobodning “Metallurg” jamoasi safarda – Muborak shahrida “Mash’al” jamoasiga qarshi o‘tkazadi. Mazkur o‘yin ushbu jamoalarning o‘zaro 32-uchrashuvi bo‘ladi.

Ortda qolgan 31 ta bahsdan keyin kichik ustunlik “Mash’al” jamoasida tomonida. Muborakliklar 14 ta o‘yinda, bekobodliklar esa 10 ta uchrashuvda g‘olib bo‘lishgan. 7 ta o‘yin durang natija bilan tugagan. To‘plar farqi – 50:45, “Mash’al” foydasiga. O‘zaro o‘yinlarda “Mash’al” 49 ochkoni, “Metallurg” esa 37 ochkoni  qo‘lga kiritgan.

“Metallurg”ning o‘zaro o‘yinlarda qozongan eng yirik g‘alabasi – 6:0 ga teng. “Mash’al”da bu ko‘rsatkich 5:1 bo‘lib turibdi. Bu yilgi mavsumning birinchi davra uchrashuvini mazkur jamoalar neytral maydon – JAR stadionida o‘tkazishdi va unda bekobodliklar 2:1 hisobida g‘alaba qozonishgandi. Murod Bobojonov hamda Salamat Quttiboyevlarning kiritgan gollariga Humoyun Murtozoyev bitta to‘p bilan javob qaytargandi.

Muborakda bo‘lib o‘tgan so‘nggi beshta uchrashuv:

10.03.2017  “Mash’al” – “Metallurg” – 1:0
11.03.2016  “Mash’al” – “Metallurg” – 1:3
15.08.2015  “Mash’al” – “Metallurg” – 1:1
21.06.2014  “Mash’al” – “Metallurg” – 3:1
24.03.2012  “Mash’al” – “Metallurg” – 2:1

“Mash’al” haqida

Muborak shahrining “Mash’al” futbol klubiga 1982 yilda asos solingan. Klubning birinchi nomi “Fakel” bo‘lgan. Uy uchrashuvlarini Muborak shahridagi Bahrom Vafoyev nomidagi stadionda o‘tkazadi. Mamlakat milliy chempionatida 1995 yildan tanaffuslar bilan ishtirok etib kelayapti. Jamoa 2005 yilda eng yaxshi natijasini qayd etib, mamlakat vise-chempioni bo‘lgan. 2007 yilda esa klub bronza medaliga sazovor bo‘lgan. Jamoa 2006 yili O‘zbekiston kubogining finaliga chiqqan. OFK chempionlari ligasida mamlakatimiz sharafini himoya etgan.

“Mash’al” bugungacha oliy liga musobaqalarida jami 512 ta uchrashuv o‘tkazgan: 208 ta g‘alaba, 211 ta mag‘lubiyat, 93 ta durang. Kiritilgan va o‘tkazib yuborilgan to‘plar farqi – 649:691.

“Mash’al”ning chempionatlarimizdagi eng yirik hisobdagi g‘alabasi – 6:1 (30.10.2009 – “Qizilqum”, 15.08.2014 – “Andijon”). Eng yirik hisobdagi mag‘lubiyati – 0:8 (28.10.1995 – “Navbahor”).