AGMK O‘zbekiston kubogi finali sari yurishni davom ettiradi. Nimchorak finalda "Lokomotiv" ustidan qozonilgan g‘alabadan keyin jamoaning chorak finaldagi raqibi qur’a natijasiga ko‘ra Bekobodning "Metallurg" jamoasi bo‘ldi. Bu gal qur’a jamoamizga uyda o‘ynash imkoniyatini taqdim etdi.

Mirjalol Qosimov boshchiligidagi jamoamiz chorak final o‘yiniga jiddiy ravishda tayyorgarlikni davom ettirmoqda. Jamoa kechadan e’tiboran klub qarorgohida yig‘ilib, "Metallurg"ga qarshi bahsga taraddud ko‘rmoqda.

O‘yin 12 dekabr kuni Olmaliqdagi OKMK sport majmuasida soat 16:00da boshlanadi.

Bevosita o‘yinga taaluqli ma’lumotlarga to‘htaladigan bo‘lsak, "Metallurg"ga qarshi joriy mavsum chempionat doirasidagi bahslarda AGMK g‘alaba qozona olmadi. Chempionat startidagi bahsda Olmaliqda durang qayd etilgan bo‘lsa, Bekobodda yagona gol mezbonlarga g‘alabani taqdim etgandi. Shuningdek, olmaliqliklarning rekord darajasiga chiqqan mag‘lubiyatsiz seriyasiga ham aynan Bekobodda kechgan o‘yin barham bergandi.

Yana bir e’tiborga molik tarafi, AGMK O‘zbekiston kubogi doirasida bunga qadar "Metallurg" bilan 3 marotaba to‘qnash kelgan va ularning barchasida mag‘lubiyatga uchragan. Shu boisdan ham AGMK bo‘lajak bellashuvga jiddiy qaraydi va prinsipial raqibga qarshi o‘zaro hisob-kitobni joyiga qo‘yishga hamda kubok doirasidagi bellashuvlardagi noxush an’anani buzishga astoydil intiladi.

AGMK va "Metallurg" jamoalari barcha musobaqalarda (chempionat, kubok va liga kubogi) jami 31 marotaba to‘qnash kelgan. O‘zaro o‘yinlardagi kichik ustunlik bekobodliklar tarafida. O‘tkazilgan uchrashuvlarda AGMK o‘z hisobiga 12 g‘alabani rasmiylashtirgan, 15 yutuq esa "Metallurg" nomiga yozilgan. Qolgan 4 bellashuvda esa g‘olib nomi aniqlanmagan. To‘plar nisbati 51-53, "Metallurg" foydasiga.

AGMK va "Metallurg" jamoalarining O‘zbekiston kubogi doirasidagi o‘yinlari:

2007 yil.
O‘zbekiston kubogi, ikkinchi bosqich o‘yini.
AGMK - "Metallurg" 0:1

2016 yil
O‘zbekiston kubogi, 1/8 final.

Birinchi o‘yin.
"Metallurg" - AGMK 1:0
Gol: F.Nomozov (81)

Javob o‘yini.
AGMK - "Metallurg" 2:3
Gollar: Y.Martinyuk (34), F.Tojiyev (40) - E.Ismoilov (8), A.No‘’monov (26), J.Hakimov (69)

AGMK Namangan sari yo‘lning ikkinchi bosqichida. Jamoamiz 12 dekabr kuni Olmaliqda yarim final chiptasi uchun bo‘ladigan muhim bahsda "Metallurg"ga qarshi saf tortadi. Bo‘lajak o‘yinda AGMKni qo‘llab-quvvatlab, suyukli jamoamizning O‘zbekiston kubogi finali sari yo‘lini davom ettirishiga dalda bo‘lish maqsadida stadionga tashrif buyuring! Chiroyli, shiddatkor va qiziqarli o‘yin kafolatlangan. Toshkent viloyati derbisi maqomidagi prinsipial jamoalar to‘qnashuvini o‘tkazib yubormang! O‘yinga kirish bepul!